Ширкати Tcell бахшида ба Рӯзи байналмилалии ҳимояи кӯдакон қариб дар ҳама гӯшаву канори кишвар чорабиниҳои идона ва консерт баргузор карда, ба атфол тӯҳфаҳо ирсол кард. Беш аз 1500 кӯдак аз хонаҳои бачагон, мактабу боғчаҳои кӯдакона ин рӯзро бо фараҳу шодмонӣ гузарониданд.

Ширкати Tcell дар чорчӯби масъулияти иҷтимоӣ бештар ба қишри осебпазири аҳолии Тоҷикистон таваҷҷуҳ зоҳир мекунад. Дар 8 шаҳру навоҳии кишвар масъулини ширкат ба парваришгоҳу хонаҳои бачагони имконияташон маҳдуд рафта, ба тарбиягирандагон тӯҳфаҳо тақдим карданд.

Tcell дар шаҳри Бохтар ба хонаи 10 тифли имконияташон маҳдуд, ки нигоҳубини онҳоро волидайнашон ба зимма доранд, тӯҳфаҳои идона бурд. Яке аз ин кӯдакон- Абдухалили 5-сола, ки мустақилона роҳ гаштан барояш сахт мушкил аст, бо сечархаи тӯҳфашуда бе душворӣ ва бо шавқу шодии беандоза ҳаракат мекард. Ба кӯдакон қуттиҳои калони ширинӣ ва ба волидайни онҳо маводи ниёзи аввал дастрас гардид.

Ҳамзамон, ҳунармандони театри лӯхтаки шаҳри Бохтар барои атфол намоиши ҷаззобу рангини идона ва ройгон ташкил карданд. Беш аз 150 кӯдак давоми рӯз бо қаҳрамонони намоиш ошно шуда, ҳамроҳ бо онон хурсандӣ карданд.

Tcell дар ноҳияи Вахш меҳмони хонаводаи аҷибе гардид: Назаров Ҳамрохон Қурбонович, ки аз даврони кӯдакӣ гунгу ношунаво аст, 12 сол боз бо ҳамсараш дар хонаи худ атфоли гунгу ношунаворо таълим медиҳанд, ба онҳо забони имову ишораро меомӯзонанд, дар бораи табиату атроф нақл мекунанд, муносибат бо ашёҳои дарсӣ-таълимиро ёд медиҳанд. Дар ҳоли ҳозир дар хона-дабистони оилавии Ҳамрохон 64 кӯдак ба таълиму тарбия фаро гирифта шудааст. 21 нафари онҳо бошанд, давоми ҳафтаи таълимӣ пурра дар ин хона зиндагӣ мекунанд. Кормандони ширкати Tcell аз ҳоли Муаллиму шогирдон бохабар гардида, ба онҳо тӯҳфаҳои идона тақдим карданд. Ногуфта намонад: ҳар кадоме аз ин кӯдакон дунёи ботинӣ ва зоҳирии зебо, дили соф ва умеду орзуҳои наҷиб доранд. 

Инчунин, дар деҳаи Хистеварзи вилояти Суғд кӯдакони имконияташон маҳдуд, ки дар осоишгоҳи махсуси “Нумӯи Сайҳун” муолиҷа мегиранд, аз ин ҷашн бенасиб намонданд. Ғизои болаззат, ки барои онҳо омода шуда буд ва тақдими тӯҳфаҳои идона табъи бачагонро болида сохт!
Хурсандии тарбиягирандагони Хонаи бачагон дар ноҳияи Фархор дар ин рӯз ҳадду канор надошт. 54 кӯдаки ин парваришгоҳ аз ҷониби ширкати Тсеll бо лавозимоти таълимию тӯҳфаҳо таъмин гардиданд.

Дар Хуҷанд ширкати Tcell бо Федератсияи Клубҳои миллии ЮНЕСКО дар Тоҷикистон чорабинии варзишии бачагонаро таҳти унвони “Варзиш- бидуни марз” доир сохтанд. Дар ин маъракаи варзишӣ беш аз 200 кӯдаки имконияти саломатиашон маҳдуд аз тамоми гӯшаву канори Тоҷикистон ширкат доштанд. Тайи ду рӯз онҳо бо якдигар дар намуди тенниси рӯи миз, давидан ба масофаи кӯтоҳ ва футбол сабқат карданд. Ҳамаи иштирокчиёни маъракаи варзишӣ бо дипломҳои хотиравӣ ва тӯҳфаҳои ширкат қадрдонӣ гардиданд.

Мактаб-парваришгоҳи атфоли малул дар ноҳияи Варзоб барои 280 нафар таълимгирандаи муассиса аз сӯи ширкати Тсеll кӯмак дарёфт кард. Бачаҳои ин даргоҳи таълимӣ дар ин рӯз соҳиби ашёҳои беҳдоштӣ-гигиенӣ гардиданд. Беш аз 100 нафар аз бачаҳои хонаи бачагони шаҳри Турсунзода бошанд, соҳиби ашёву ҷиҳози варзишӣ- тӯб, саққо ва ҳалқаву бандҳои варзишӣ шуданд. Дар ин ҷо иди ҳақиқии варзиш бо озмуну тӯҳфаҳои хотирмон ба сурат пазируфт.

Дар ноҳияи Ишкошими ВМКБ шодиву нишоти хурдтараконро бо сухан наметавон тасвир кард. Масъулини ширкати Tcell рӯзи 1-уми июн ба 70 кӯдаки хурдсол аз марказҳои рушди барвақтии кӯдакон ашёҳои таълимӣ тӯҳфа карданд, то ки онҳо ҳаматарафа босавод бошанд ва рушд ёбанд.

Ҳамзамон, ширкати  Tcell дар ин рӯз бо радиои “Азия Плюс” иқдоми вижаро таҳти унвони “Ҳамроҳ мехонем” роҳандозӣ кард. Аз ин ба баъд дар чорчӯби ин лоиҳа ҳунармандони шинохта, мусиқачиён, сеҳргарон ва дигар шахсони маъруф ба хонаи бачагони воқеъ дар шаҳри Душанбе рафта, бо онҳо мулоқот менамоянд, саргузашташонро нақл мекунанд, ҳамроҳ баҳс меороянд ва китобу маҷалла мехонанд.   

Ҷашнвораи бузург барои кӯдакон ҳамроҳ бо мусиқӣ, ҳунарнамоии сеҳркорон ва ҳазлу шӯхии ширинкорон дар пойтахти кишвар- шаҳри Душанбе бо мусоидату сарпарастии ширкати Tcell он ҳам дар ҳавои кушод доир гардид. Вуруд ба майдончаи идгоҳ комилан ройгон буд ва тамоми рӯз дар ин ҷо озмуну мусиқӣ, чорабиниҳои тафреҳӣ бе танаффус идома доштанд. Атфоли ба ин ҷо омада бо шириниҳо ком ширин мекарданд ва бо камоли майл дар майдонча рақсу бозӣ доштанд. 

Аснои баргузории маъракаву чорабиниҳои идона бахшида ба “Рӯзи ҳимояи кӯдакон” ширкати Тсеll дар ҳама минтақаҳои кишвар- НТМ, вилоёти Хатлону Суғду ВМКБ ҳузури густурда дошт. Беш аз 1500 кӯдак аз гӯшаву канори Тоҷикистон бо тӯҳфаҳо қадрдонӣ шуданд.     

Tcell ҳамчун ширкати масъулияти иҷтимоидошта ҳамеша тарҳҳои хайриявиро баргузор ва сарпарастӣ менамояд. Tcell дар ҷомеъаи муосири Тоҷикистон ҳамвора ба ёрии қишри осебпазири аҳолӣ омода аст ва ин иқдомро идома медиҳад.